मंत्रिमंडळ विस्तारात कोल्हापूरची पाटी राहणार कोरी ; चंद्रकांत पाटील यांना संधी

 कोल्हापूर/गीता संघर्ष वृत्तसेवा 

 राज्य मंत्रिमंडळाचा विस्तार आज  (ता. ९) होत असला तरी अद्याप शपथविधीसाठी येण्याचा निरोप भाजप-शिंदे गटाला पाठिंबा दिलेल्या कोल्हापूर जिल्ह्यातील आमदारांना मिळालेला नाही. त्यामुळे विस्तारात कोल्हापूरची पाटी कोरीच राहण्याची शक्यता आहे.

मंत्रिपदासाठी जिल्ह्यातील आमदार राजेंद्र पाटील-यड्रावकर,  प्रकाश आबिटकर, डॉ. विनय कोरे व प्रकाश आवाडे  प्रमुख दावेदार आहेत. उद्याच्या विस्तारात फक्त कॅबिनेट दर्जाच्या मंत्र्यांना शपथ दिली जाणार असल्याने कोल्हापुरातील यापैकी कोणाची वर्णी लागेल का नाही, याविषयी संभ्रम आहे.

 शपथविधीनंतर निर्माण होणारी नाराजी टाळण्यासाठी पहिल्यांदा जुन्या मंत्र्यांनाच दोन्ही गटांकडून संधी दिली जाण्याची शक्यता आहे. मंत्रिमंडळ विस्ताराचा पुढील टप्पा १२ ऑगस्टच्या सुनावणीनंतर होण्याची शक्यता आहे.

मंत्रिमंडळ विस्तारात कोल्हापूरचे सुपुत्र व भाजपचे प्रदेशाध्यक्ष चंद्रकांत पाटील यांचा समावेश निश्‍चित असल्याचे समजते. श्री. पाटील मंत्री झाल्यास जिल्ह्यातून अन्य कोणाला संधी मिळेपर्यंत त्यांच्याकडे कोल्हापूरच्या पालकमंत्री पदाची जबाबदारी सोपवण्यात येईल, अशी चिन्हे आहेत.