खिद्रापूर / गीता संघर्ष ऑनलाईन डेस्क।
कोल्हापूर जिल्ह्यातील ऐतिहासिक आणि जगप्रसिद्ध कोपेश्वर मंदिरासाठी ओळखले जाणारे खिद्रापूर सध्या गंभीर समस्येने ग्रासले आहे. एकीकडे हे गाव मोठे पर्यटन केंद्र म्हणून नावारूपाला येत असताना, दुसरीकडे मंदिराच्या आसपासच्या परिसरात, अगदी पर्यटकांच्या पार्किंग आणि शौचालय परिसरातही खुलेआम मटक्याचे अड्डे सुरु असल्यामुळे कायदा व सुव्यवस्थेचा प्रश्न निर्माण झाला आहे. या प्रकारामुळे महिला पर्यटकांना मोठ्या त्रासाला सामोरे जावे लागत असून ग्रामस्थांनी स्थानिक पदाधिकाऱ्यांच्या कार्यक्षमतेवर तीव्र नाराजी व्यक्त केली आहे.
पर्यटनाला लाजिरवाणे ग्रहण, महिला पर्यटकांना मनस्ताप
खिद्रापूर येथील हेमाडपंती कोपेश्वर मंदिर हे स्थापत्यकलेचा उत्कृष्ट नमुना आहे, ज्यामुळे देश-विदेशातून हजारो भाविक आणि पर्यटक येथे येतात. या पर्यटनवाढीसाठी मोठ्या-मोठ्या विकास योजनांच्या घोषणाही केल्या जातात. मात्र, या विकासाच्या बाता फोल ठरवत, मंदिराच्या अगदी जवळच, विशेषतः पर्यटकांसाठीच्या पार्किंगच्या जागेत आणि सार्वजनिक शौचालय परिसरात मटका घेणारे व खेळणारे यांचा बिनबोभाट वावर वाढला आहे.
या अनैतिक प्रकारामुळे गावाचे पर्यटन स्थळ म्हणून असलेले पावित्र्य भंग पावत आहे. सर्वात गंभीर बाब म्हणजे, यामुळे महिला पर्यटकांना प्रचंड मनस्ताप सहन करावा लागतोय. या बेकायदेशीर धंद्यांमुळे परिसरातील वातावरण गलिच्छ आणि असुरक्षित बनले आहे, ज्यामुळे अनेक महिला पर्यटकांना लाजिरवाण्या प्रसंगांना सामोरे जावे लागते.
पदाधिकाऱ्यांवर 'बंद डोळ्यां'चा आरोप
ग्रामस्थांमध्ये या प्रकारामुळे तीव्र संताप व्यक्त होत आहे. "दुसऱ्याच्या कामाच्या ठिकाणी उभे राहून 'मी हे काम केले' म्हणून सोशल मीडियावर स्टेटस ठेवणाऱ्या स्थानिक पदाधिकाऱ्यांनी या गंभीर समस्येकडे डोळे बंद केले आहेत का?" अशी संतप्त विचारणा ग्रामस्थांमधून केली जात आहे. ज्या ठिकाणी पर्यटकांची, विशेषतः महिला आणि कुटुंबांची मोठी वर्दळ असते, त्याच ठिकाणी अशाप्रकारे बेकायदेशीर जुगार सुरु असल्यामुळे गावाच्या आणि जिल्ह्याच्या प्रतिमेला मोठा धक्का बसत आहे.
या मटका अड्ड्यांमुळे गावातील तरुण पिढी व्यसनाधीनतेकडे ओढली जात असून, शांत आणि धार्मिक ओळख असलेल्या खिद्रापूर गावासाठी ही बाब चिंताजनक आहे.
प्रशासनाची उदासीनता की मूकसंमती?
ग्रामस्थांनी अनेकवेळा याबद्दल स्थानिक पोलीस आणि प्रशासनाकडे तक्रारी केल्या आहेत. मात्र, अद्यापही यावर कोणतीही ठोस कारवाई झालेली नाही. हे बेकायदेशीर धंदे खुलेआम सुरु असल्याने, याला प्रशासनाचे दुर्लक्ष की स्थानिक पदाधिकाऱ्यांची मूकसंमती आहे, अशी शंका ग्रामस्थ उघडपणे व्यक्त करत आहेत.
कोपेश्वर मंदिरासारख्या पवित्र आणि ऐतिहासिक स्थळाच्या ठिकाणी, तसेच पर्यटकांच्या सोयीसाठी तयार केलेल्या सार्वजनिक जागांमध्ये असे अवैध धंदे सुरु राहणे हे अत्यंत खेदजनक आहे. स्थानिक प्रशासन आणि संबंधित पदाधिकाऱ्यांनी तात्काळ या गंभीर समस्येकडे लक्ष देऊन मटका अड्ड्यांवर कठोर कारवाई करावी, महिला पर्यटकांच्या सुरक्षेची हमी द्यावी आणि खिद्रापूरला पुन्हा एकदा त्याचे पर्यटन आणि धार्मिक पावित्र्य मिळवून द्यावे, अशी मागणी आता जोर धरू लागली आहे.
0 Comments